സത്യപ്രതിജ്ഞയ്ക്ക് വിജയ് ആവശ്യപ്പെട്ടത് ബീസ്റ്റ് സിനിമയിലേതുപോലെയുള്ള സ്യൂട്ട്, ഒരാഴ്ചമുമ്പേ പ്ലാൻ ചെയ്തു

വിവാദങ്ങൾക്കും അനിശ്ചിതത്വങ്ങൾക്കുമൊടുവിൽ തമിഴ്നാട് മുഖ്യമന്ത്രിയായി നടൻ വിജയ് അധികാരമേറ്റു. വിജയ്‌യുടെ സത്യപ്രതിജ്ഞയില്‍ ആവേശഭരിതരായിരിക്കുകയാണ് ആരാധകര്‍. കറുത്ത സ്യൂട്ട് ധരിച്ചായിരുന്നു കഴിഞ്ഞദിവസം വിജയ് സത്യപ്രതിജ്ഞാ ചടങ്ങിന് എത്തിയത്. സിനിമാ സ്റ്റൈലിലുള്ള ഈ എൻട്രിയും വിജയ്‌യുടെ വസ്ത്രധാരണവും സോഷ്യൽ മീഡിയയിൽ ശ്രദ്ധ നേടിയിരുന്നു. ഒരാഴ്ച എടുത്ത് കൃത്യമായ പ്ലാനിങ്ങോടെയാണ് വിജയ്ക്ക് ധരിക്കാനുള്ള വസ്ത്രം ഡിസൈൻ ചെയ്തതെന്ന് പറയുകയാണ് ഡിസൈനർ സാഫിർ അഹമ്മദ്.

ക്ലാസിക് നോച്ച് ലാപ്പലും മിനിമലിസ്റ്റ് ടു- ബട്ടൺ സിൽഹൗട്ടും ചേർന്ന മാറ്റ് ഫിനിഷുള്ള കറുപ്പ് സ്യൂട്ടും ചെറിയ തിളക്കമുള്ള ചുളിവുകൾ വീഴാത്ത വെള്ള ഷർട്ടുമടങ്ങുന്നതാണ് വിജയ് സത്യപ്രതിജ്ഞയ്ക്ക് ധരിച്ച വേഷം. ചെന്നൈ ആസ്ഥാനമായി പ്രവർത്തിക്കുന്ന സാഫിർ ആൻഡ് ഷദാബ് എന്ന ഡിസൈനിങ് സ്ഥാപനമാൻ വിജയിയുടെ വസ്ത്രങ്ങൾക്ക് പിന്നിൽ പ്രവർത്തിച്ചത്. നിരവധി താരങ്ങളുടെ കോസ്റ്റ്യൂമുകൾ ഇവർ തയ്യാറാക്കിയിട്ടുണ്ട്. ബീസ്റ്റ്' സിനിമയിലേതുപോലെയുള്ള സ്യൂട്ടാണ് സത്യപ്രതിജ്ഞയ്ക്ക് വേണ്ടി വിജയ് ആവശ്യപ്പെട്ടത്.

'എന്തുവേണമെന്ന ബോധ്യം അദ്ദേഹത്തിനുണ്ടായിരുന്നു. കറുപ്പ് തിരഞ്ഞെടുത്തത് ബോധപൂർവ്വമാണ്. പ്രചാരണങ്ങൾക്ക് ക്രീം- ഇളം നിറങ്ങൾ നല്ലതാണ്. പക്ഷേ, ഇത്രയധികം ശ്രദ്ധിക്കപ്പെടില്ല. കറുപ്പ് വേദിയിലും ക്യാമറയിലും പെട്ടെന്ന് ആകർഷിക്കപ്പെടും. 'ജനനായകൻ' ചിത്രത്തിന്റെ മലേഷ്യയിലെ ഓഡിയോ ലോഞ്ച് പരിപാടിയിൽ നീല സ്യൂട്ടായിരുന്നു വിജയ് ധരിച്ചത്. സത്യപ്രതിജ്ഞയ്ക്ക് ഇതിൽനിന്ന് വ്യത്യസ്തമായ ഒന്ന് വേണമെന്ന് അദ്ദേഹം ആവശ്യപ്പെട്ടു' , സാഫിർ പറഞ്ഞു. ഒരാഴ്ചമുമ്പാണ് ഇതിനുവേണ്ടിയുള്ള പ്ലാനിങ് തുടങ്ങിയതെന്നും ശരിയായി തയ്‌ച്ചെടുക്കാൻ രണ്ടുദിവസമെടുത്തുവെന്നും സാഫിർ പറയുന്നു.

അതേസമയം, തമിഴ് സിനിമ മേഖലയില്‍‌ ഏറ്റവും കൂടുതല്‍ പ്രതിഫലം വാങ്ങുന്ന താരങ്ങളില്‍ ഒരാളായ വിജയ്ക്ക് മുഖ്യമന്ത്രി എന്ന നിലയില്‍ എത്രയായിരിക്കും ശമ്പളം എന്നത് സംബന്ധിച്ച ചർച്ചയും ഇതിന് പിന്നാലെ സാമൂഹിക മാധ്യമങ്ങളില്‍ ആരംഭിച്ച് കഴിഞ്ഞു. തമിഴ്‌നാട് മുഖ്യമന്ത്രിയെന്ന നിലയില്‍ വിജയ്ക്ക് പ്രതിമാസം ലഭിക്കുന്ന ആകെ ശമ്പളം 2,85,000 രൂപയാണ്. ഇതിൽ 2,05,000 രൂപ അടിസ്ഥാന ശമ്പളവും ബാക്കി തുക വിവിധ അലവൻസുകളുമാണ്. മറ്റ് ഇന്ത്യൻ സംസ്ഥാനങ്ങളിലെ മുഖ്യമന്ത്രിമാരുടെ ശമ്പളവുമായി താരതമ്യം ചെയ്യുമ്പോൾ തമിഴ്നാട് മുഖ്യമന്ത്രിയുടെ ശമ്പളം ഒരു ഇടത്തരം നിരക്കിലാണ് വരുന്നത്. ഇന്ത്യയിൽ ഏറ്റവും കൂടുതൽ ശമ്പളം വാങ്ങുന്ന മുഖ്യമന്ത്രി തെലങ്കാന മുഖ്യമന്ത്രിയാണ്. പ്രതിമാസം ഏകദേശം 4.10 ലക്ഷം രൂപയാണ് അദ്ദേഹത്തിന്റെ വേതനം.

ശമ്പളത്തിന് പുറമെ വിപുലമായ മറ്റ് ആനുകൂല്യങ്ങളും തമിഴ്‌നാട് മുഖ്യമന്ത്രിക്ക് ലഭിക്കും. ചെന്നൈയിലെ ആഡംബര വസതി, പ്രത്യേക സുരക്ഷാ സംവിധാനങ്ങൾ (Z+ കാറ്റഗറി), ഔദ്യോഗിക വാഹനവ്യൂഹം, വിമാന-ട്രെയിൻ യാത്രകൾക്കുള്ള പൂർണ്ണ ചിലവുകൾ എന്നിവ ഇതിൽ ഉൾപ്പെടുന്നു. ഓരോ സംസ്ഥാനത്തെയും നിയമസഭകളാണ് അതാത് മുഖ്യമന്ത്രിമാരുടെ ശമ്പളം നിശ്ചയിക്കുന്നത് എന്നതിനാൽ സംസ്ഥാനങ്ങൾക്കനുസരിച്ച് ഈ തുകയിൽ വലിയ വ്യത്യാസങ്ങൾ കാണാറുണ്ട്.

Content Highlights:  Costume designer Safir Ahmed has shared details about the Chief Minister look worn by Joseph Vijay in Jana Nayagan. According to him, Vijay personally requested a suit inspired by his stylish appearance in Beast for the oath-taking ceremony sequence.